Autor: Administrador

Por que merendar nun río?

Porque é un espazo natural con escaso mobiliario urbano, caracterizado pola súa amplitude para moverse e interactuar coa natureza, sen obstáculos e sen contaminación acústica.

Será unha merenda diferente, non utilizaremos cadeiras, nin mesas, nin pratos, en definitiva, instrumentos cotiás. A merenda será no chan, cun contacto directo coa natureza,  ao carón do río. Pero tamén será diferente porque será compartida cos/coas compañeiros/as e, sobre todo, coas familias.

A adaptación ao entorno pode ser complicada porque o chan é irregular, pero á vez gratificante porque nos sentaremos en círculo, mantendo un contacto visual. Isto proporcionaralles estimulación social e sensorial, ademais de educar na conciencia ambiental.

Comezamos levando a cabo un obradoiro de fotografía no río, para obter imaxes. Cada persoa retrata aqueles espazos, obxectos, elementos do río que máis lle interesen.  

Posteriormente, coa lectura de obras relacionadas coa contorna natural, selecciónanse frases que acompañen cada mes do ano.

Despois, chegará o momento de maquetar o calendario. Empregaranse entón as imaxes e citas seleccionadas entre todas.

A dinámica de traballo ten que involucrar a todas as persoas tendo en conta as súas potencialidades. Como a proposta abarca unha diversidade de tarefas tan amplas, todas poderemos participar nalgunha medida ao longo do proceso.

Levaremos a cabo unha actividade de orientación á realidade, partindo do entorno natural do Loña, para diferenciar as características das estacións. Con esta iniciativa buscamos identificar o paso do tempo e aumentar a sensación de control sobre o contexto, observando os cambios producidos no río.

Ao longo do ano, realizaremos catro visitas ao río, observando as mudanzas estacionais e tomando fotografías da visita. Previamente, farase a lectura de contos adaptados, e, posteriormente elaborarase un mural coas imaxes tomadas.

A actividade comprende catro visitas ao río, unha en cada estación, e en cada visita repetiremos o mesmo esquema de traballo:

• Sesión de preparación: lectura dun conto con pictogramas para anticipar a actividade.
• Sesión no río: interacción guiada cos diferentes elementos naturais, tomando fotografías e identificando aspectos do río que cambian nas distintas estacións.
• Sesión de análise: empregando as fotografías e facendo uso da memoria, adicaremos un momento á reflexión sobre as mudanzas estacionais.

Por último, elaboraremos unha memoria gráfica da actividade: un mural que recolla as mudanzas no río, a través das fotografías tomadas durante todo o ano.

Moitas persoas, pasan a maior parte do día en contextos físicos moi estruturados e pouco estimulantes (o seu propio fogar, centros educativos, centros de día, centros residenciais…). O que pretendemos é xerar oportunidades de aprendizaxe nun contexto diferente: aberto, dinámico e cambiante.

Aprenderemos a identificar elementos do medio natural, interatuando con el, descubrindo novas sensacións e emocións.

Como? Xogando. Cada participante terá un soporte gráfico daqueles elementos do río que hai que identificar. Terá que localizalos e confirmar que están presentes no espazo. Irá almacenando nunha lista de comprobación, aqueles que atopou. Acompañaremos a actividade, proporcionando pistas ou facilitando a actividade para non xerar frustración coa procura. Trátase de observar e coñecer, non de competir.

Mediante esta proposta pretendemos que as persoas adquiran, coa axuda das súas familias, as habilidades necesarias para facer un uso autónomo dos espazos comunitarios. O que implica tanto coñecer o río, como adaptarnos á comunidade e ao medio, recoñecendo as “regras” de comportamento implícitas nos diferentes espazos polos que se van a desprazar, para así desenvolverse cunha maior autonomía.

Queremos conseguir que as persoas con TEA, interioricen e xeneralicen a adecuación da vestimenta á climatoloxía, o manexo dos cartos para o desprazamento en transporte público e as diferentes alternativas para poder chegar ao río e gozar del dunha maneira responsable.

Facendo uso de distintas historias ou guións sociais dixitais, facilitaremos o desenvolvemento da visita ao río Loña. Unha historia serviranos para apoiar a selección da vestimenta, outro para manexarnos no autobús e, un último, para chegar até o río dando un paseo.